டிட்வா புயல் தாக்கம்: வயல்கள், குடியிருப்புகளை சூழ்ந்த மழைநீர் – டெல்டா மாவட்டங்களின் நிலவரம் என்ன?

திருவாரூர் அழகிரி காலனி பகுதியில் வீட்டுக்குள் புகுந்த மழைநீரை வெளியேற்றும் பெண்.

தஞ்சாவூர்/ திருவாரூர்/ நாகப்பட்டினம்/ மயிலாடுதுறை/ காரைக்கால்: வங்கக் கடலில் உருவாகியுள்ள டிட்வா புயல் காரணமாக டெல்டா மாவட்டங்களில் நேற்று கனமழை பெய்தது. இதனால், சம்பா,தாளடி பயிர்கள் மற்றும் தாழ்வான குடியிருப்பு பகுதிகளில் மழைநீர் சூழ்ந்துள்ளதால் மக்கள் அவதியடைந்துள்ளனர்.

தென்மேற்கு வங்கக் கடல் மற்றும் அதையொட்டிய இலங்கை கடலோர பகுதிகளில் உருவான காற்றழுத்த தாழ்வு மண்டலமான டிட்வா புயலால், டெல்டா மாவட்டங்களான தஞ்சாவூர், திருவாரூர், நாகை, மயிலாடுதுறை, காரைக்கால் மாவட்டங்களில் கனமழை பெய்தது. மேலும், ரெட் அலர்ட் விடுக்கப்பட்டிருந்த நாகை, காரைக்கால், மயிலாடுதுறை மாவட்டங்களில் அதிகனமழை பெய்தது. கடலோர பகுதிகளில் அதிக அளவிலான தரைக்காற்று வீசியது.

காரைக்கால் மாவட்டம் திருநகர் குடியிருப்பு பகுதியில் தேங்கியுள்ள மழைநீர்

தஞ்சாவூர் மாவட்டத்தில் நேற்று முன்தினம் இரவு தொடங்கி நேற்று மாலை வரை இடைவிடாது மழை பெய்தது. இதனால், தாழ்வான பகுதிகளில் மழைநீர் தேங்கி, பொதுமக்கள் அவதிக்குள்ளாகினர். மாவட்டம் முழுவதும் 2 ஆயிரம் ஏக்கரில் சம்பா, தாளடி நெற்பயிர்களை மழைநீர் சூழ்ந்துள்ளதால், விவசாயிகள் கவலை அடைந்துள்ளனர்.

32 மீனவ கிராமங்களைச் சேர்ந்த 10 ஆயிரத்துக்கும் மேற்பட்ட மீனவர்கள் கடலுக்குச்செல்லவில்லை. 200 விசைப் படகுகள், 2,000-க்கும் மேற்பட்ட நாட்டுப் படகுகள் பாதுகாப்பாக நிறுத்திவைக்கப்பட்டுள்ளன. திருவையாறு அருகே மகாராஜபுரம் கிராமத்தில் பழமையான புளியமரம் முறிந்து விழுந்ததில் குடிசை வீடு சேதமடைந்தது.

தஞ்சாவூர் மாவட்டம் திருவையாறு அருகே மகாராஜபுரம் கிராமத்தில் கனமழையால் புளியமரம் முறிந்து விழுந்து சேதமடைந்த குடிசை வீடு.

மாவட்டத்தில் நேற்று மாலை 4 மணிவரை பதிவான மழையளவு விவரம்(மில்லி மீட்டரில்): குருங்குளம் 58, ஒரத்தநாடு, நெய்வாசல் தலா 51, மஞ்சளாறு 49, அய்யம்பேட்டை 48, வெட்டிக்காடு 47, திருவிடைமருதூர் 45, ஈச்சன்விடுதி 41, பேராவூரணி 36, தஞ்சாவூர் 32, திருவையாறு 28, கும்பகோணம், அதிராம்பட்டினம் தலா 27, பூதலூர் 26, பாபநாசம், பட்டுக்கோட்டை தலா 25, அணைக்கரை 24, திருக்காட்டுப்பள்ளி 23, கல்லணை 11, மதுக்கூர் 9.

திருவாரூர் மாவட்டத்தில் கடந்த 3 நாட்களாக பரவலாக மழை பெய்துவந்த நிலையில் நேற்று கனமழை பெய்தது. இதனால், பல்லவராயன் கட்டளை, புழுதிக்குடி, விக்கிரபாண்டியம், கோட்டூர் உள்ளிட்ட பகுதிகளில் 1,300 ஏக்கரில் தாளடி பயிர்கள் மழைநீரில் மூழ்கியுள்ளன. இதேபோல, மாவட்டம் முழுவதும் 50,000 ஏக்கர் சம்பா, தாளடி பயிர்களை மழைநீர் சூழ்ந்துள்ளதால், விவசாயிகள் வேதனை அடைந்துள்ளனர்.
நாகை மாவட்டம் நாகூர் வள்ளியம்மா நகரில் குடியிருப்புகளை சூழ்ந்த மழைநீர்.

மாவட்டத்தில் நேற்று காலை வரையிலான மழையளவு (சென்டி மீட்டரில்): திருத்துறைப்பூண்டி 4.1, முத்துப்பேட்டை 3.1, மன்னார்குடி, திருவாரூரில் தலா 2.6. நாகை மாவட்டத்தில் நேற்று முன்தினம் இரவு தொடங்கிய கனமழை நேற்றும் தொடர்ந்தது. இதனால், நாகூர் வள்ளியம்மா நகர் மற்றும் வேளாங்கண்ணி ரயில் நிலையம் அருகில் உள்ள குடியிருப்பு பகுதிகளுக்குள் மழைநீர் புகுந்ததால் மக்கள் அவதியடைந்தனர்.

கடல் கடும் சீற்றத்துடன் காணப்பட்டதுடன், கடலோர பகுதிகளில் காற்றின் வேகமும் அதிகரித்துள்ளது. 27 மீனவ கிராமங்களில் உள்ள 3,500 நாட்டுப் படகுகள், 750 விசைப்படகுகள் கடலுக்கு மீன்பிடிக்கச் செல்லவில்லை. ஒரு லட்சத்துக்கும் அதிகமான மீனவர்களின் வாழ்வாதாரம் பாதிக்கப்பட்டுள்ளது.

மயிலாடுதுறை மாவட்டம் காழியப்பநல்லூர் ஊராட்சியில் குடியிருப்பு பகுதிகளை சூழ்ந்துள்ள மழைநீரில் தவிக்கும் பொதுமக்கள்

வழக்கமாக பக்தர்கள் கூட்டம் அதிகமாக காணப்படும் வேளாங்கண்ணி பேராலயம் புயல் காரணமாக நேற்று வெறிச்சோடியது. கடற்கரையில் சுற்றுலாப் பயணிகள் குளிக்க தடை விதித்து, கயிறுகளை கட்டி போலீஸார் பாதுகாப்பு பணியில் ஈடுபட்டிருந்தனர். நேற்று நண்பகல் 12 மணி நிலவரப்படி, மாநிலத்திலேயே அதிகபட்சமாக நாகை மாவட்டத்தில் உள்ள கோடியக்கரையில் 31.20 செ.மீ. மழையளவு பதிவாகியிருந்தது.

வேளாங்கண்ணி கடற்கரையில் ஆபத்தை உணராமல் செல்ஃபி எடுத்த சுற்றுலா பயணிகள்

மாவட்டத்தின் பிற இடங்களில் பதிவான மழையளவு(சென்டி மீட்டரில்): தோப்புத்துறை 20, திருப்பூண்டி 20, வேளாங்கண்ணி, வேதாரண்யம் தலா 18, நாகை 17. மயிலாடுதுறை மாவட்டத்தில் நேற்று காலை வரை மிதமான மழையும், மதியம் முதல் கனமழையும் பெய்தது. தரங்கம்பாடி, பூம்புகார், பழையாறு உள்ளிட்ட பகுதிகளில் கடல் மிகுந்த சீற்றத்துடன் காணப்பட்டது. கடலோர பகுதிகளில் பலத்த காற்று வீசியது. மீனவர்கள் கடலுக்கு மீன்பிடிக்கச் செல்லவில்லை.

நாகை மாவட்டம் வேளாங்கண்ணியில் சூழ்ந்திருந்த மழைநீரை டிராக்டர் மூலம் அகற்றும் பணி.

தாழ்வான பகுதிகளிலும், குறுகலான சாலைகளிலும், விளைநிலங்களிலும் மழைநீர் தேங்கியது. மக்களின் இயல்பு வாழ்க்கை முற்றிலும் பாதிக்கப்பட்டது. தரங்கம்பாடி வட்டம் திருக்கடையூர் அருகேயுள்ள காழியப்பநல்லூர் ஊராட்சியில் ரத்தினம் நகர், புதுத்தெரு உள்ளிட்ட பகுதிகளில் குடியிருப்பு பகுதிகளில் மழைநீர் சூழ்ந்துள்ளதால், 60-க்கும் மேற்பட்ட குடும்பத்தினர் வெளியே வரமுடியாமல் தவித்தனர்.

திருவாரூர் மாவட்டம் முத்துப்பேட்டை அருகே கோவிலூர் அரசு பள்ளியில் அமைக்கப்பட்டுள்ள முகாமில் தங்கியுள்ள மக்கள்.

மாவட்டத்தில் நேற்று மாலை 4.30 மணி வரை பதிவான மழையளவு(மில்லி மீட்டரில்): மயிலாடுதுறை 84.80, மணல்மேடு 49, சீர்காழி 84.60, கொள்ளிடம் 57.60, தரங்கம்பாடி 61.01, செம்பனார்கோவில் 119.70.காரைக்கால் மாவட்டத்தில் மழையின் தீவிரத்தால் மக்கள் வீடுகளிலேயே முடங்கினர். நேற்று மதியம் 2.30 மணி வரையிலான 6 மணிநேரத்தில் 120.6 மி.மீ. மழையளவு பதிவானது.