நானும் மேட் இன் இண்டியா’ தான்: பிரான்ஸ் தொழிலதிபரின் பேச்சை கேட்டு பிரதமர் மோடி புன்முறுவல்
புதுடெல்லி: பிரான்ஸ் நாட்டின் விமான இன்ஜின் பழுதுபார்க்கும் நிறுவனமான சஃப்ரானின் ஆலை ஹைதராபாத்தில் நேற்று முன்தினம் திறக்கப்பட்டது. இந்த ஆலையை பிரதமர் நரேந்திர மோடி டெல்லியில் இருந்து காணொலி வாயிலாக தொடங்கிவைத்தார். அப்போது அவர் பேசும்போது, “விமான போக்குவரத்து துறையில் இந்தியா புதிய பாதையில் பயணிக்கிறது. விமான பராமரிப்பு, பழுது பார்ப்பு, புதுப்பித்தல் துறையில் உலகின் மையமாக இந்தியா உருவெடுக்க சஃப்ரான் நிறுவனம் உறுதுணையாக இருக்கும்” என்று தெரிவித்தார்.
சஃப்ரான் நிறுவன தலைவர் ரோஸ் மெக்கின்ஸ் பேசும்போது, “பிரதமர் நரேந்திர மோடியின் இந்தியாவில் தயாரிப்போம் திட்டத்துக்கு நாங்கள் உறுதுணையாக இருப்போம். நான் இந்தியாவில் பிறந்தேன். நானும் மேட் இன் இண்டியா தான்” என்று தெரிவித்தார்.பிரான்ஸ் தொழிலதிபரின் நகைச்சுவையை ரசித்த பிரதமர் மோடி தன்னையறியாமல் புன்முறுவல் பூத்தார். இந்த வீடியோ சமூக வலைதளங்களில் வைரலாக பரவி வருகிறது.
கடந்த 1954-ம் ஆண்டு மார்ச் 8-ம் தேதி இந்தியாவின் கொல்கத்தாவில் ரோஸ் மெக்கின்ஸ் பிறந்தார். அவரது பெற்றோர் ஆஸ்திரேலியாவை பூர்விகமாகக் கொண்டவர்கள். கொல்கத்தாவில் இருந்து அவர்கள் பிரான்ஸ் தலைநகர் பாரிஸில் குடியேறி, அந்த நாட்டின் குடியுரிமையைப் பெற்றனர். இதையே ரோஸ் மெக்கின்ஸ் தனது உரையில் நகைச்சுவையாக குறிப்பிட்டார்.
